之前講起，香港第15任港督梅含理喺1912年上任嘅時候，有槍手試圖行刺佢，但最終失敗，咁今次不如講下梅含理嘅故事。

話說早喺1881年，梅含理以「官學生」（類似現今AO）嘅身份入警隊做督察，之後被借調到唔同政府部門。佢經過一番努力，分別喺1891年同1892年做過助理輔政司同助理庫務司，然後喺1893年、佢33歲嘅時候，重返警隊做警察總監。

喺梅含理出任警察總監期間，曾經搗破一宗貪污案，揭發警隊居然有辦公室成為賭博集團嘅總部，當中警隊「阿二」等高層、低層職工包括清潔員工等共超過100人涉案，最終一名外籍督察罪成，被判入獄六個月。梅含理做咗9年警察總監之後，喺1902年升任輔政司，之後喺1911年被調任斐濟總督，1912年返香港出任港督，成為香港至今首位曾經做過警隊「一哥」嘅首長。

不過梅含理嘅處事作風唔多受歡迎，據講佢份人嚴厲苛刻，表情嚴肅、唔多笑，最終佢做咗7年港督之後離任返英國，嗰陣居然無咩人肯出席歡送儀式。

原圖取自網絡